علق علاء نبيل، المدير الفني لاتحاد الكرة، على إعلان رحيله عن الاتحاد بصورة رسمية، خلال الساعات القليلة الماضية، وتوجيه الشكر له من جانب «الجبلاية».
وقال علاء نبيل في تصريحات تلفزيونية: «أنا ليس لي أي دخل بكل ما يخص المنتخب الأول، ودي لوائح من الفيفا، لكن ليا دخل في منتخبات الناشئين والشباب والأولمبي فقط، والدليل أنني لم أحضر أي فعاليات تخص المنتخب الأول».
علاء نبيل: راضٍ تمامًا بكل ما قدمته خلال عملي
وأكد «نبيل»: «أنا راضٍ تمامًا عن كل ما قدمته خلال عملي في منصب المدير الفني لاتحاد الكرة، وتعيين شخص آخر بعدي هذا أمر يخص الاتحاد، لكن هناك كشف حساب لما قدمته خلال عامين».
وأوضح: «أنا بشكر الاتحاد على البيان المحترم اللي نزلوه، والبيان بيوضح إن العلاقة قوية ومش لازم نخرج بخناقة، لكن هو طلع بطريقة شيك جدًا وأهم حاجة فيه إنه ذكر المجهود اللي حصل في الفترة الماضية».
وأضاف علاء نبيل: «المدير الفني للاتحاد ملهوش دعوة خالص بالمنتخب الأول، سواء اللي راح المغرب أو اللي راح قطر، الموضوع ده خاص بمجلس الإدارة عشان الناس مش واصلها المعلومة دي».
وشدد على أن «وصول منتخبات الناشئين والشباب لكأس العالم ده إنجاز، طيب لو مكنوش وصلوا لكأس العالم كان حصل إيه؟».
علاء نبيل: «الرخص التدريبية اللي اتعملت كانت موقوفة»
وتابع: «الرخص التدريبية اللي اتعملت كانت موقوفة، وشوف كام مدرب عملها لما عادت من جديد، وده حصل بعد ما تواصلت مع الاتحاد الإفريقي.. أنا اهتميت بتطوير المدرب المصري وتدريبه، فمينفعش الحاجات دي تتنسي عشان نتيجة مباراة!».
